पूर्ण श्रद्धा बसली

 डॉ.आरोसकर हे सोलापुरातील प्रसिद्ध नेत्रतज्ञ डॉक्टर होते. त्यांना १९५५ मध्ये श्री.गुरुदेव रानडे यांची डोळे तपासण्यास गुरुदेवांचे शिष्य श्री.गोळे व श्री.नाडकर्णी त्यांना घेऊन निंबाळला घेऊन गेले होते. पण त्यादिवशी गुरुदेवांची व त्यांची भेट झाली नाही. दुसऱ्या रविवारी परमार्थ बैठक (सीटिंग) झाल्यावर कुणीतरी गुरुदेवांना सांगितले की सोलापूरहून आपले डोळे तपासण्यास डॉ.आले आहेत. श्री.गुरुदेव खुर्चीत बसले व डॉक्टर त्यांचे डोळे तपासू लागले.मोठे लेन्स लावून ते डोळ्यात निरखून पाहू लागले. प्रथम त्यानं काहीच दिसेना. मग पुन्हा पाहू लागताच एक तेज:पुंज असा प्रखर प्रकाश श्री.गुरुदेवांच्या डोळ्यात त्यांना दिसला. डॉक्टर जरासे लटपटले व मागे सरकले. त्यांनी लेन्स खाली ठेवले व श्री.गुरुदेवांचे पाय धरले. त्यांच्या पायावर डोके ठेवले व म्हणाले "आपल्या डोळ्यातील तेज मला सहन करणे शक्य नाही." श्री.गुरुदेव त्यांना म्हणाले " बर बर आता पुन्हा तपासा !" त्यानंतर डॉ.नी पुन्हा डोळे तपासले. ते अगदी नेहमी सारखेच होते. डॉक्टर हे अगोदर नास्तिक होते. पण या प्रसंगानंतर या डॉक्टरांची गुरुदेवांच्या ठायी पूर्ण श्रद्धा बसली. ते पुढे गुरुदेवांचे निस्सीम भक्त झाले.