आर्थिक वर्षाचा अखेर

 🌼🌼🌼🌼🌼🌼

३१ मार्च म्हणजे आर्थिक वर्षाचा अखेरचा दिवस. त्या निमित्ताने ही विशेष कविता...

*हिशोब काय ठेवायचा, रिटर्न काय मागायचा!*

अनंत काळाच्या अखंड ओघात

आपल्या अल्पशा आयुष्याचा...

हिशोब काय ठेवायचा आणि रिटर्न तरी काय मागायचा !   ll१ll

जीवनाने भरभरून दिले.

जे नाही मिळाले त्याचा...

हिशोब काय ठेवायचा आणि रिटर्न तरी काय मागायचा !   ll२ll

मित्रांनी अलोट प्रेम दिले

मग शत्रूंनी दिलेल्या त्रासांचा...

हिशोब काय ठेवायचा आणि रिटर्न तरी काय मागायचा !    ll३ll

मधुर आठवणी इतक्या आहेत

मग काही कटु अनुभवांचा...

हिशोब काय ठेवायचा आणि रिटर्न तरी काय मागायचा !    ll४ll

मिळाली कौतुकफुले कैकवेळा जनांकडून

मग बोच-या काट्यांचा...

हिशोब काय ठेवायचा आणि रिटर्न तरी काय मागायचा !    ll५ll

उगवणारा प्रत्येक सूर्य प्रकाशमान.

मग रात्रीच्या अंधाराचा...

हिशोब काय ठेवायचा आणि रिटर्न तरी काय मागायचा !    ll६ll

आनंदाचे दोन क्षण पुरे जगायला.

मग उदासवाण्या क्षणांचा...

हिशोब काय ठेवायचा आणि रिटर्न तरी काय मागायचा !     ll७ll

चंद्र शीतल, आल्हाददायक.

मग त्याच्यावरील लांछनांचा...

हिशोब काय ठेवायचा आणि रिटर्न तरी काय मागायचा !     ll८ll

नुसत्या आठवांनीही होते मन उल्हसित.

मग कुणी भेटल्याचा अन् न भेटल्याचा...

हिशोब काय ठेवायचा आणि रिटर्न तरी काय मागायचा !    ll९ll

काही तरी चांगलं आहेच प्रत्येकामध्ये.

मग किरकोळ दोषांचा...

हिशोब काय ठेवायचा आणि रिटर्न तरी काय मागायचा !   ll१०ll

नाही ठेवला हिशोब, नाही लिखापढी

आहे त्याच्यापाशी, 'चित्रगुप्ताची' चोपडी

हिशोबून सारे त्याने ठरवायचे...

वसूल करायचे की रिटर्न द्यायचे!   ll११ll

*नव्या आर्थिक वर्षाच्या शुभेच्छा!*

(३१ मार्च २०२४)

🌼🌼🌼🌼🌼🌼