वळण लागले

 *🌹🌹!! श्रीराम समर्थ !!🌹🌹*

*🌸अपराध्यांना प्रेमाने वळवून सन्मार्गास लावले🌸*

*श्रीमहाराज एकदा गोंदवल्यास ओढ्यावर स्नान करीत होते. त्यावेळी पुढे दोन, मागे दोन  पोलीस शिपाई व मधे दोन चोर, असे सहाजण दहीवडीला कोर्टात हजर रहाण्यास चालले होते.* *शिपायांपैकी एकजण श्रीमहाराजांचा शिष्य होता. आपल्या नाईकाच्या परवानगीने तो ओढ्याकडे श्रीमहाराजांच्या दर्शनासाठी आला . श्रीमहाराजांनी त्यास म्हटले, "आता थोड्याच वेळात रामाचा प्रसाद  होईल. तुम्ही सर्वांनी तो घेवून पुढे जावे."*          

*"आरोपीच्या हातात बेड्या आहेत. त्या काढण्याचा आपल्याला अधिकार नाही, म्हणून त्यांना प्रसाद घेता येणार नाही ,"  अशी सबब शिपायाने पुढे केल्यावर श्रीमहाराज म्हणाले, '' तुमच्या नाईकांना विचारावे, व प्रसाद घेण्यापुरत्या त्यांच्या बेड्या काढल्या तर ते आरोपी पळून जाणार नाहीत, याची हमी मी    घेतो ". नाईकाने ते कबूल केले व सगळेजण पोटभर जेवले. निघायच्या वेळी आरोपी श्रीमहाराजांच्या पाया पडायला आले  असता श्रीमहाराज त्यांना म्हणाले, " या खेपेस जर रामाने गय केली तर आपण चोरी कायमची सोडणार का ? " दोघांनीही ते कबूल केले. पुढे खटला चालला व संशयाचा फायदा मिळून दोघेही सुटले ! ते तसेच गोंदवल्यास आले व श्रीमहाराजांच्या पाया पडले. रामाच्या पायावर हात ठेवून , इतःपर चोरी करणार नाही , अशी शपथ त्यांनी घेतली.* 

*श्रीमहाराजांनी त्यांना नाम दिले. काही दिवस ठेवून घेतले व पाठवणी करतांना प्रत्येकास १०० रु. देवून, एकास मेंढपाळाचा तर दुसर्यास कोंबड्यांचा धंदा करायला सांगितले. दोघांच्याही जीवनाला प्रभू श्रीरामचंद्र व श्रीमहाराजांच्या कृपाशिर्वादाने चांगले वळण लागले.*

*!! श्रीराम जयराम जय जय राम !!*

*प पू सद्गुरू श्रीब्रह्मचैतन्य गोंदवलेकर महाराज*